BALITA | Pahayagang Pangkampus sa Distrito ng Pitogo, Muling Sisimulan!

PAGTATAPOS: Paggawad ng sertipiko sa PCHS kasama sina Gng. Lizaneth N. Gonzalvo, Tagapag-ugnay ng Gawain(una sa kanan), Dr. Frederick Alba, punong-guro I sa AES, (pangalawa), Gng. Soledad Ros, punong-guro I RES (pangatlo), Dr. Edilbert L. Cadeliña, dalubguro I at Tagatagalakay sa pagsasanay (pang-apat), Bb. Diosa P. Olase, tagapayo ng Ang Punong Pitogo (panlima), at mga mag-aaral ng PCHS.

Pahayagang Pangkampus sa Distrito ng Pitogo, Muling Sisimulan!

ulat ni Mar Z. Holanda

Nakilahok ang Pitogo Community High School (PCHS) sa isinagawang dalawang araw na training-workshop para sa muling pagsisimula ng mga paaralan sa kanilang mga pahayagan sa Distrito ng Pitogo noong Nobyembre 18 at 19, 2023.

Sa pangunguna ng punong-gurong nakatala sa pahayagang pangkampus, Gng. Soledad Ros, punong-guro mula sa Rizalino Elementary School naging matagumpay ang pagsasanay na layuning muling makapagsimula sa pagbuo ng diyaryo ang mga paaralan sa Pitogo.

Ang pagsasanay ay bahagi ng pa rin ng serye ng mga programa at gawain ng Distrito ng Pitogo na pinonduhan ng Lokal na pamahalaan upang mas patatagin ang edukasyon sa Pitogo.

Ayon kay G. Mar Z. Holanda, tagapayo ng Ang Punong Pitogo, napakagandang pagkakataon na makalahok ang PCHS sa ganitong gawain upang maisakatuparan na ang matagal na pangarap ng paaralan na makabuo ng diyaryo sa tulong at suporta ng paaralan at ng distrito.

Walo sa mga mag-aaral ng PCHS kasama ang mga tagapayo ng kanilang pahayag na sina G. Holanda, Guro I sa Filipino 10, Gng. Marylie P. Luico, Guro I sa Filipino 8 at Diosa P. Olase, Guro I sa Filipino 7 ang lumahok sa nasabing pagsasanay.

Positibo naman si Gng. Ros na masimulan na ng mga paaralan ang pahayag sapagkat ayon sa kaniya'y noon pa man, namamayagpag na ang bayan ng Pitogo sa larangang ito.

Tadhana namang maituturing ni Dr. Meriam C. Camposano, tagamasid pampurok ang pagdating niya sa Pitogo dahil noon pa man ay pangarap na niyang magkaroon ng pahayag ang mga paaralan at distrito na kaniyang napaglilingkuran.

"Ako ay napa-assign na sa iba't ibang distrito at pinagarap kong magkaroon ng campus journalism ang mga paaralan ... ngayon ito ay magkakaroon na ng katuparan sa bayan ng Pitogo" ani Dr. Camposano.

Bukod sa PCHS dumalo rin sa training-workshop ang lahat ng paaralan mula sa elementarya at sekundarya. 

Liban sa pangarap na makapagsimulang muli ang Pitogo sa Dyornalismo, nais ding makalahok ng bayan sa nalalapit na Division Schools Press Conference na isasagawa sa Unisan, Quezon ngayong darating na Enero. #

Read More

BALITA | Positibong Komento, Natanggap ng PCHS mula sa isinagawang DFTA at OBE Monitoring

 Positibong Komento, Natanggap ng PCHS mula sa isinagawang DFTA at OBE Monitoring 

• Mar Z. Holanda | Setyembre 4, 2023

Matagumpay na bumisita at nagbigay ng Technical Assistance (TA) sina ASDS Herbert D. Perez at EPS Fernando T. Seño ng Kagawaran ng Edukasyon (DepEd) Sangay ng Quezon sa Pitogo Community High School (PCHS) upang masubaybayan ang pagsasagawa ng Oplan Balik-Eskwela (OBE) sa paaralan noong biyernes – Setyembre 1, 2023.

Sang-ayon sa Pandibisyong Memorandum ng DepEd Quezon bilang 691 serye 2023, magsasagawa ng pagbisita ang naturang ahensya sa mga paaralan sa Quezon, partikular ang mga nasa Division Field Technical Assistance (DFTA) Team na kinabibilangan nina ASDS Perez at EPS Seño upang tingnan ang mga paaralan sa ikatlong distrito ng Quezon hinggil sa pagsisimula ng klase sa mga paaralan.

Sa pag-iisa-isa ng mga bisita sa paaralan nakita ng mga itong naaayon sa mga polisiya ng Kagawaran ang implementasyon ng paaralan sa pagsisimula ng klase lalo na ang mga silid-aralan na mainit na pinag-uusapan ngayon sa sektor ng edukasyon dahil sa bagong mandato ng kalihim ng edukasyon VP Sara Z. Duterte-Carpio hinggil sa pagtanggal ng mga dekorasyong nakakagambala sa pagkatuto ng mga mag-aaral.

Pinuri din ng DFTA Team ang preparasyon at pagsasaayos ng paaralan at ayon sa kanila'y maaari itong maging susugugan ng ibang paaralan sa distrito sa pamamagitan ng benchmarking activity.

Matatandaan na noong nakaraang taon ay nakatanggap ng 11 milyong halaga ng pondong ginamit para sa pagsasaayos ng mga silid-aralan sa pamumuno ng dating punungguro ng paaralan, Dr. Peter Andrew G. Regencia.

Masaya naman si Gng. Rosario M. Bulfa, opisyal na tagapamahala ng paaralan (OIC) sa narinig na mga positibong komento mula sa mga opisyal ng DepEd Quezon.

Aniya, "Maswerte ang PCHS dahil maraming biyayang natanggap ang paaralan na nakatulong upang maayos at agad nakatugon sa hinihingi ng Kagawaran ng Edukasyon" pahayag ng OIC.

Bilin naman ng mga bumisitang opisyal na alagaan ang mga bagong gawang silid-aralan upang mapanatiling kondusibo ang mga klasrum na nakatutulong sa epektibong proseso ng pagtuturo at pagkatuto.

Kasama rin ng mga bisita mula sa Deped Quezon sina Tagamasik Pampurok Meriam C. Camposano, School Head-in-charge for Governance and Operations (ShiGO) at Punungguro II Janette Abanador, District Nurse Chiqui Serafica at Tagapag-ugnay sa Impormasyong Pandistrito (DIC) at Learners' Information System (LIS) Aldwin A. Forbes sa pagsubaybay sa nasabing paaralan.

Read More

TINGNAN | Pitogo Community High School sa Pagsisimula ng Taong Panuruan 2023-2024

 

Pitogo Community High School (PCHS) sa Pagsisimula ng Klase para sa TP 2023-2024

• Mar Z. Holanda | August 29, 2023

Ligtas at matagumpay na pagsalubong ang ibinigay ng Pitogo Community High School (PCHS) sa mga mag-aaral sa unang araw ng klase - Agosto 29, 2023

Pagkatapos ng unang flag-raising ceremony para sa taong panuruan 2023-2024 ng PCHS, sinalubong ng mga guro at kawani ng paaralan ang mga mag-aaral sa pagbabalik-eskwela para sa bagong panuruan.

Nagbigay ng mensahe si Gng. Rosario M. Bulfa, opisyal na tagapamahala ng paaralan hinggil sa ilang bagay na dapat panatilihin upang maging maayos at produktibo ang maging bunga ng buong taong punuruan.

Ibinahagi ng ina ng paaralan sa mga mag-aaral na laging kumilos nang ayon sa kagustuhan ng diyos, ano ang makakabuti sa para sa kanila bilang mag-aaral, at gawing makabuluhan ang bawat oras sa mga gawaing pampaaralan.

Bilin rin niya sa mga mag-aaral, “Gawin ninyo ang inyong responsibilidad bilang isang mag-aaral, responsibilidad bilang kabataan ng ating komunidad at responsibilid ninyo sa inyong tahanan.”

Samantala isa-isa ring ipinakilala ang mga guro sa mga mag-aaral nang sa gayon ay maging pamilyar ang mga ito at makilala ang mga tagapayo ng bawat pangkat sa bawat antas ng kurikulum sa paaralan.

Dumating din at nagbigay ang kapulisan mula sa Pitogo Municipal Police Station ng ilang paalala upang mapanatiling ligtas ang mga mag-aaral sa anumang posibilidad ng krimen gaya ng pagnanakaw. Ani ng kapulisan, iwasan magdala ng mga gamit na mainit sa mata ng mga kawalan nang sa gayon ay hindi sila mapahamak.

Bago matapos ang programa para sa unang araw ng eskwela nag-iwan si Gng. Bulfa ng pagganyak na pahayag sa lahat. Saad niya, “Piliing ngumiti, piliing magmahal, piliing maging mabuti, piliing maging masaya at siyempre piliin maging ikaw!”

Sa mga silid-aralan kani-kaniya nang oryentasyon ang mga tagapayo ng paaralan at sinimulan na rin ang pagtuturo sa mga nananabik na mag-aaral ng taong-panuruan 2023-2024. #

Read More

BALITA | BASTA'T SAMA-SAMA, KAYANG-KAYA: Gng. Bulfa sa Ginanap na PCHS BE 2023 Panimulang Seremonya

  

KAMAO NG PAGKAKAISA: Sama-samang pagtanggap sa hamon ng pakikibahagi ng mga stakeholdes mula sa iba't ibang sektor ng lipunan ng bayan ng Pitogo kasama sina Gng. Rosario M. Bulfa, Opisyal na Tagapamahala ng Paaralan at sina Gng. Analaine T. Roldan at G. Antonino A. Dagta, Tagapag-ugnay ng Brigada Eskwela ng Paaralan sa ginanap na Seremonya ng Pagsisimula ng BE 2023 sa Pitogo Community High School. -kuha G. Arvie M. Villarosa

Mar Z. Holanda | Ang Punong Pitogo | Tomo I, Bilang 1 - Brigada Eskwela

Masayang Hinamon ni Gng. Rosario M.Bulfa, Opisyal na Tagapamahala ng Paaralan ang lahat ng dumalo at nakibahagi sa isinagawang Brigada Eskwela (BE) 2023 Kick-Off Ceremony ng Pitogo Community High School (PCHS) noong Agosto 14, 2023.

Sa kaniyang pagbibigay ng mensahe, ipinahayag ni Gng. Bulfa ang kaniyang pasasalamat at hamon sa mga stakeholders at indibidwal na katuwang ng paaralan sa paghahanda para sa pagsisimula ng taong panuruan 2023-2024.

Aniya, hindi magiging matagumpay ang nakalipas na taong-panuruan kung hindi dahil sa parehong internal at external stakeholders.

Nagbigay rin ng kani-kaniyang mensahe ang mga dumalong panauhin mula sa iba't ibang sektor ng lipunan upang ipahayag ang kanilang suporta sa paaralan.

Matapos maisagawa ang panunumpa ng pakikibahagi sa PCHS Brigada Eskwela 2023 ng mga stakeholders isa-isa ring lumagda ang mga ito sa "Lagdaan ng Pakikiisa" na bahagi ng programa ng PCHS BE 2023.

Samantala siniguro naman ni G. Antonino A. Dagta, BE Koordineytor ang ligtas at makabatang kapaligiran bago magsimula ang mga klase sa paaralan at ito ay sa tulong ng mga tagapagtangkilik.

Sa huling bahagi ng programa ay nagsagawa ang mga guro, kawani at stakeholders ng isang motorcade bilang paalala sa komunidad ng pagsisimu;la ng BE 2023 sa PCHS.

Read More

BALITA | Lagda ng Pakikiisa, Programa para sa BE 2023

  

PAGHAHANDA: Pagbibigay mensahe ni Gng. Rosario M. Bulfa, opisyal na tagapamahala ng paaralan sa pagpupulong tungkol sa paghahanda ng paaralan sa darating na pasukan lalo't higit sa mga plano para sa Brigada Eskwela 2023 -kuha ni G. Antonino A. Dagta

Antonino A. Dagta | Ang Punong Pitogo | Tomo I, Bilang 1 - Brigada Eskwela 2023

Nabuo ang proyektong Lagda ng Pakikiisa sa isinagawang pagpupulong ng mga guro ng PCHS hinggil sa pagsisimula ng taong panuruan (TP) 2023-2024 na ginanap sa silid ng baitang 7 pangkat Chastity noong Agosto 4, 2023.

Sa pangunguna ng dalawang tagapag-ugnay mula sa Dyonyor Hayskul at Senyor Hayskul na sina G. Antonino A. Dagta at Gng. Analaine T. Roldan kanilang iminungkahing na magkaroon muli ng proyekto sa pagsasagawa ng programa para sa BE 2023.

Matatandaang ang proyektong "Susian ng Pakikiisa" ay matagumpay na naisagawa sa nakalipas na taong-panuruan para sa paghahatid ng ligtas at maayos na kapaligiran para sa paaralan sa pangunguna rin ng mga masisipag na tagapag-ugnay at nakalipas na punong-guro ng paaralan. Dr. Peter Andrew G. Regencia.

Kapareho ng layunin nito ang bagong proyekto na nakasentro sa pagbibigay ng kondusibong kapaligran at masiguro ang mataas na kalidad ng edukasyon sa paaralan sa pamamagitan ng tulong at pakikiisa ng komunidad, organisayon at indibidwal sa mga proyekto ng paaralan.

Samantala, isinagawa ang paglagda ng mga tagapagtangkilik o katuwang ng paaralan sa ginanap na Kick-off Ceremony noong Agosto 14, 2023.

Read More

BALITA | Suporta ng Komunidad sa BE 2023, Patuloy!

  

TULONG-TULONG: Sama-samang paglilinis ng miyembro 4Ps Dulong Bayan sa paaran bilang pakikibahagi sa PCHS BE 2023. -kuha ni G. Antonino A. Dagta

Mar Z. Holanda | Ang Punong Pitogo | Tomo I, Bilang 1 - Brigada Eskwela 2023

Patuloy sa pagsuporta ang mga tagapagtangkilik mula sa iba't ibang sektor ng lipunan sa programa ng Pitogo Community High School Brigada Eskwela (BE) 2023.

Sa kasalukuyang pagsasagawa ng BE sa mga paaralan na may temang "Bayanihan para sa Matatag na Paaralan" ay agad namang tinugunan ng mga katuwang ng paaralan mula sa komunidad.

Lubos naman ang pasasalamat ng pinuno ng paaralan at mga tagapag-ugnay ng BE 2023 at mga guro ng paaralan sa walang humpay na pakikiisa ng mga ito para sa paghahatd ng ligtas at dekalidad na edukasyon para sa mga batang Pitogohin at patuloy na hinihikayat ang iba pa na makiisa sa paghahanda sa TP 2023-2024.

Read More